Семяновіч Валянціна Міхайлаўна
Семяновіч Валянціна Міхайлаўна нарадзілася 21 студзеня 1941 года ў г.Жлобін. Падчас вайны сям’я эвакуіравалася на Урал. Вярнуліся з эвакуацыі ў 1944 годзе, калі Валянціне было 3 гады, у пасёлак Шацілкі (г.Светлагорск).
Закончыла восем класаў на выдатна і без экзаменаў паступіла у Мазырскае педагагічнае вучылішча. Закончыла Гомельскае музыкальна-педагагічнае вучылішча, бо Мазырскае расфарміравалі. Па размеркаванні Валянціна Міхайлаўна была накіравана настаўніцай пачатковых класаў у Любанскі раён, дзе выбрала для працы Малагарадзячыцкую сярэднюю школу, у якой адпрацавала 37 гадоў. Так як у школе не хапала піянераў, Валянціна Міхайлаўна працавала пазаштатнай піянерважатай і адначасова настаўніцай пачатковых класаў.
Праз некатооры час Валянціна Міхайлаўна выйшла замуж, у яе нарадзіліся два сыны - Ігар і Сяргей.
За гады работы Валянціна Міхайлаўна выпрацавала сваю методыку выкладання ў пачатковых класах, ахвотна дзялілася ёй з калегамі. Да работы адносілася добрасумленна, працавала творча, за час працы дала вялікую колькасць адкрытых урокаў для маладых спецыялістаў, выступала з дакладамі і выступленнямі з вопыту работы ў раёне і школе.
Арганізатарскія здольнасці Валянціны Міхайлаўны, уменне працаваць з людзьмі, прага і адчуванне новага былі заўважаны і яна на працягу амаль 25 гадоў была нязменным старшынёй прафсаюзнага камітэта.
Валянціна Міхайлаўна была майстрам сваёй справы, аб гэты сведчаць прысвоеныя ёй званні:
• 1985 г. - “Старшы настаўнік”
• 1989 г. - “Настаўнік-метадыст”;
• 1991 г. - настаўнік вышэйшай катэгорыі.
Яна мае ўзнагароды:
• Медаль “За трудовое отличие”;
• Медаль “За доблесный труд”;
• Знак “Победитель социалистического соревнования 1974 года”.
Усе этапы яе жыцця былі чэснай, добрасумленнай працай. Валянціна Міхайлаўна ўдзячна свайму лёсу, бацькам, людзям, якія навучылі яе любіць дзяцей, верыць у іх, вучыць і дапамагаць ім. Вось так ад пачатку і да канца сваёй працоўнай дзейнасці: праца ў адной школе і жыццё, аддадзенае вучням.
Зараз яна з’яуляецца старшынёй праваслаўнага прыхода храма Свяціцеля Мікалая, які знаходзіцца ў Малых Гарадзячыцах.
